Вобразы мінуўшчыны
(да 600-годдзя Грунвальдскай бітвы)
15.05 – 13.06.2010
18.00
15 мая 2010 года а 18-й гадзіне ў рамках міжнароднай акцыі “Ноч музеяў” у Нацыянальным гістарычным музеі Рэспублікі Беларусь адбудзецца адкрыццё мастацкай выстаўкі “Вобразы мінуўшчыны”, прысвечанай 600-годдзю Грунвальдскай бітвы. Дадзеная выстаўка – сумесны праект музея з Беларускім саюзам мастакоў (уваход па запрашальных білетах).
Грунвальдская бітва – вырашальная бітва Вялікай вайны 1409–1411 гадоў паміж Вялікім Княствам Літоўскім і Польшчай з аднога боку і Тэўтонскім ордэнам з другога. Войскі саюзнікаў, якія ўзначальвалі Вітаўт і Ягайла, ушчэнт разбілі крыжакоў. Перамога саюзных войскаў падарвала магутнасць ордэна і паклала канец нападам крыжакоў на беларускія, літоўскія і польскія землі. У 2010 годзе з нагоды святкавання гэтай славутай гістарычнай падзеі ў Рэспубліцы Беларусь запланаваны разнастайныя ўрачыстыя мерапрыемствы, якія праходзяць пры падтрымцы Міністэрства культуры Рэспублікі Беларусь.
На выстаўцы прадстаўлены жывапісныя творы, скульптурныя працы, станковая і кніжная графіка беларускіх мастакоў: Гаўрыіла Вашчанкі, Уладзіміра Савіча, Міколы Купавы, Паўла Татарнікава, Уладзіміра Вішнеўскага, Сяргея Бандарэнкі, Сяргея Гумілеўскага і іншых, у творчасці якіх значнае месца займае гістарычная тэматыка.
Усе творы, размешчаныя на выстаўцы, аб’яднаны агульнай гістарычнай тэматыкай і адлюстроўваюць слаўныя старонкі беларускай гісторыі. У экспазіцыі шырока прадстаўлены амаль ўсе мастацкія жанры: партрэт, краявід, батальны жанр і інш. Пачэснае месца займае тут гістарычны партрэт. Гэта выявы князёў Альгерда, Кейстута, Вітаўта, Ягайлы і іншых постацей, чые славутыя імёны ўпісаны ў нашу гісторыю. У сваёй рабоце над вобразамі мінуўшчыны мастакі творча выкарыстоўвалі кніжныя мініяцюры, жывапісныя партрэты мастакоў мінулых стагоддзяў, імкнучыся пры гэтым перадаць сваё асабістае бачанне той ці іншай асобы.
Выстаўка "Вобразы мінуўшчыны" да 600-годдзя Грунвальдскай бітвы
- 713 праглядаў